Peqqissaasutut Ilinniartitaanermi Peqqissutsimullu Ilisimatusarnermi Instituttimi Ph.d.-nngorniut siulleq Kal.Nun. isumaginninnermi politikkimik ukkassilersitsivoq

ILISIMATUSARFIK    Grønlands Universitet. Postboks 1061. DK-3900 Nuuk. Telefon 385600. Telefax 323588

 

  1. Juni 2014

Tusagassiorfinnut nalunaarut

Ilisimatusarfimmi Peqqissaasutut Ilinniartitaanermi Peqqissutsimullu Ilisimatusarnermi Instituttimi pisortap Suzanne Møller-ip tusagassiuutinut nalunaarutaa. 

Peqqissaasutut Ilinniartitaanermi Peqqissutsimullu ilisimatusarnermi Instituttimi pingasunngornermi juunip ulluisa aqqarnanni pernaammik Ph.d-nngorniummik illersuisoqarpoq. Steven Arnfjord taamaalilluni Ilisimatusarfimmi Ph.d.nngortut arfinilissarilerpaat. Ilisimatuutut allaatigisaa qulequtaqarpoq "Inunnik isumaginninnermi siunnersortit peqatigalugit ilisimatusarfiginiakkami ilisimatusarneq -Kalaallit Nunaanni atugarissaarnermut tunngatillugu ilinniakkap qarsupinneqartup nukittorsagaanissaa”. 

Inunnik isumaginninnermi siunnersortit peqatigiiffiat NIISIP suleqatigalugu inuiaqatigiinni inunnik isumaginninnikkut ajornartorsiutit qitiutinneqarnerulernissaat ilisimatusarnermi aallaaviuvoq. 

Inunnik isumaginninnermi siunnersortit qanoq ilillutik kattullutik aaqqissuussaanerisa nukittorsarneqarnissaa, ilinniagaqarnertik tunuliaqutaralugu nukittunerulernissaat inuiaqatigiinnilu navianartorsiortunut suli namminneq inuttut atukkatik pillugit politikkikkut oqallinnermi tutsiuttanngitsunut oqaaseqartartuunissaat suliniutaavoq. 

Naliliisut tassaapput ilisimatooq Torunn Hamran Tromsøe-p universitetianeersoq, ilisimatooq Peter Berliner Aarhusip Universitetianeersoq ilisimatoorlu Jan Kampmann Roskildip Universitetianeersoq. 

Ph.d.-nngorniarneq Peqqissaasutut Ilinniartitaanermi Peqqissutsimulli Ilisimatusarnermi Instituttimi Syddansk Universitetimilu ilisimatuumit Lise Hounsgaard-imit ilitsersuisuuffigineqarpoq. 

Suliniut Kalaallit Nunaanni Ilisimatuussutsikkut Misissuinernut Kommissionimit Namminersorlutillu Oqartussat ilisimatusarnermik siuarsaanermut aningaasaateqarfiannit aningaasaliiffigineqarpoq. 

Ajornartorsiutinik nalinginnaasunik aaqqeeqataasinnaaneq anguniarlugu ilisimatusarnerit annertunerusut inuiaqatigiinni ingerlanneqarnissaannik pingaartitsisumut Kalaallit Nunaannut ilisimatusariaaseq annertuumik tapersiisoq naliliisut oqaatigaat.


Paasissutissat sukumiinerusut Instituttip pisortaa Suzanne Møller mailikkut: sum@pi.uni.gl imal. oqarasuaatikkut:: + 299 385902 attavigalugu pissarsiarineqarsinnaapput.