Peqqissaanermik Ilinniarfik Kalaallit Nunaanni Peqqinnissaqarfiup inerisarneqarnerani nukissamik tunisinissaa ilaatigut siunertaralugu 1993-imi maajip aallaqqaataani pilersinneqarpoq. Peqqinnissaqarfiup Kalaallit Nunaanni Namminersornerullutik Oqartussanit akisussaaffittut danskit naalagaaffiannit tiguneqarnera ilutigalugu peqqinnissaqarfiup iluani tunngaviusumik ilinniartitaanerni, ilinniaqqinnerni qaffasissumillu ilinniagaqaqqinnerni ilinniarfimmik pilersitsinissamik kissaateqarneq pilersitsinermi tunngaviuvoq.

Oktobari qaammat 2008 ilinniartitaanerit tamakkerlutik Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoqarfiup ataani inissisimalissasut aalajangiunneqarpoq. Peqqissaasutut ilinniartitaanerup aaqqissuussaanikkut Ilisimatusarfiup ataani inissisimalerneranik, pikkorissaanerit ilinniaqqinnerillu peqqinnissaqarfiup ataaniiginnarnerannik, peqqinnissakkut tunngaviusumik ilinniartitaanerit inuussutissarsiutinut qitiusumik ilinniarfittut pilersinneqarnerannik Peqqissaanemillu Ilinniarfimmik ingerlatsinermut akisussaaffilerneqarneq tamatuma nassataraa.

Immikkoortut taakku pingasut tamarmik Peqqissaanermik Ilinniarfimmi (PI) inissisimapput.

Peqqissaasutut ilinniartitaaneq

Kalaallit Nunaanni peqqissaasutut ilinniartitaanermik Danmarkimisut/Nunani Avannarlernisut qaffasissusilimmik pilersitsinissaq taamaalillunilu peqqissaanermik siammarsaasutut /sundhedsmedhjælperitut ilinniartitaarmut taartaanissaa 1990-imi Kalaallit Nunaanni Inatsisartunit aalajangiunneqarpoq. Ilinniakkap aaqqisuussaanerata peqqissaasutut ilinniartiutaanerup Danmarkimi nunanilu allani sulisinnaatitaanermut uppernarsaatitaarnermik kinguneqarnissaa, taamatuttaaq Kalaallit Nunaanni ingerlanneqarnissaat illersorneqarsinnaanngippat isumatusaarnerunngippallu, Danmarkimi qaffasinnerusumik ilinniaqqinnissamut immikkullu ilisimasalittut ilinniaqqinnissamut periarfissiinissaq qulakkeerneqassaaq. Peqqissaasunngorniat siulliit januaari qaammat 1994 ilinniarnertik aallartippaat.

Peqqissaasutut ilinniartitaanerup nunarsuarmi tamarmi peqqissaasutut ilinniartitaanertut qaffasitsiginissaanut piumasaqaat naapertorlugu ilinniarnerup immikkoortunut agguataarneqarnera (semester) pillugu innersuussutit, sulinermik sungiusarnerup piukkunnarsarnera tamatumunngalu atatillugu sap.ak. arfineq marlunni sulinermik sungiusaasussatut ilinniartitaaneq, Kalaallit Nunaannilu peqqissaasutut ilinniarsimasup piginnaasatigut ilisarnaataasa ilinniakkap aaqqissuussaanerani ilanngunneqartarnerat Ilinniartitaanermut siunnersuisoqatigiit qulakkeerpaat. "Siunissami qaffasissumik ilinniartitaanerit pitsaassusaat, eqaassusaat ataqatigiissusaallu" qulequtsikkamik juuni qaammat 2001 KIIIP isumasioqatigiissitsivoq. Isumasioqatigiissitsinissaq sioqqullugu "Ilinniartitsisutut, peqqissaasutut inunnillu isumaginninnermi siunnersortitut ilinniartitaaneq pillugu nassuiaat, maj 2001" KIIIP-imit suliarineqarpoq. Novembari qaammat 2001 KIIIP ” Kalaallit Nunaanni akunnattumik sivisussusilimmik qaffasissumik ilinniartitaanerit tallimat ilisimatusarfimmi ilinniartitaanertut naleqqussarneqarnissaat pillugu misissuinissap aallartisarneqarnissaa” qulequtsiullugu ilinniarfinnut allagaqarpoq. ”killiffik pillugu nalunaarusiaq –peqqissaasutut bacheloritut ilinniartitaanerup inatsisitigut naliliiviginera” PI-mit januaari qaammat 2001 tunniunneqarpoq.

KIIIP-ip 2002-mi marsip ulluisa arfineq pingajuanni PI-mut allakkamini pisariaqartinneqartut uku tikkuarpai:

  • Ilinniartitsisut piginnaasaasa qaffasissusaat, ilinniartitaanerit ilisimatusarnermut attuumasuteqarnissaat.
  • ECTS-pointiliisarnerup eqqunneqarnissaa
  • Ilinnialernissamut piukkunnaatillit ilinniarnertuunngorsimanngitsut ilinnialersinnagit ilinniarnertuunngorniatut qaffasissusilimmik pikkorissaanerit eqqunneqarnissaat.
  • Aggusti qaammat 2004 bachelorinngorniarnerup eqqunneqarnissaata naatsorsuutigineqarnera

Ilinniartitsisunut piginnaasatigut piumasaqaatitut taaneqartut, januaari qaammat 2003 PI-mi ilinniartitsisunut ilinniarsimassutsikkut piumasaqaatit tamatumunngalu atatillugu bachelorinngorsimanissamut piumasaqaat, Peqqissutsimut Pisortaqarfik nr. 14-imi ilanngunneqarput. PI-mi ilinniartitsisut 1998-imiit alisissumit ilinniartitaaneq Peqqissutsimut pisortaqarfimmi aningaasanik tamatumunnga atugassianik aningaasaliiffigineqartoq aqqutigalugu kandidatinngorniarlutik-aamma/imal. masterinngorniarlutik piginnaanngorsarneq aallartippaat.

Peqqinnissakkut tunngaviusumik ilinniartitaanerit

1994-imi isumaginninnermi peqqissaanermilu ikiortit ilinniaqatigiit siulliit najukkani inuussutissarsiutinut ilinniarfinni ilinniarnertik aallartippaat 1996-imilu isumaginninnermi peqqissaanermilu ikiortinngorniat ilinniaqatigiit siulliit Peqqissaanermik Ilinniarfimmi peqqissaanermi ikiortinngorniatut inuussutissarsiutinut qitiusumik ilinniarfimmiipput. Tamatuma kingorna ukiumut ilinniaqatigiit marluk peqqissaanermik ikiortinngorniatut inuussutissarsiutinut qitiusumik ilinniarfimmiittarput. 2000-imiit isumaginninnermi peqqissaanermilu ikiortitut ilinniartitaanermik allannguinissaq suliniutaavoq, 2005-imilu marsi qaammat peqqissaanermi ikiortitut ilinniartitaaneq aallartilluni.

Oktobari qaammat 2000 sundhedsassistentitut ilinniartitaaneq isumaginninnermi peqqissanermilu ikiortitut ilinniarnermit ingerlariaqqiffiusoq aallartippoq. Sundhedsassistentitut ilinniarnerup naammassereernerani sundhedsassistenti immikkut ilsimasalittut ilinniartitaanikkut- ilaatigut ernisussiornermut imal. kinguaassiuutitigut nappaatinut immikkut ilisimasalittut ilinniaqqinnissamut periarfissinneqarpoq. 2001-imiit 2004-mut sundhedsmedhjælperit ilinniakkap ilassutaatut akuerineqarlutik sundhedsassistentitut ilinniartitaanissamut periarfissinneqarput. Sundhedsmedhjælperit 36-it qaammatini arfineq marlunni sundhedsassistentinngorniarlutik ingerlaqqipput. Ilinniartitaaneq 2006-imi nanginneqarpoq Aningaasanullu Inatsimmi aningaasaliiffigineqarnikkut 2006-imi, 2007-imi 2008-milu sundhedsmedhjælperit 42-it sundhedsassistentimut ingerlaqqipput.

2008-mi portøritut annaassiniartartutut ilinniartitaaneq aallartippoq. 

Pikkorissaanernut immikkoortortaqarfik

Marsi qaammat 1994 ilinniaqqinnermut pikkorissarnermullu immikkoortortaq pilersinneqarpoq, tamatumanilu politikkikkut anguniagassatut siunniussanik piginnaasanik inerisaanissamut neqerooruteqarnikkut, peqqissutsimik siuarsaanermik, pitsaaliuinermik ilinniakkallu akimorlugit suleqatigiinnermik ikorfartuinissaq siunertaavoq. Suliat peqqinnissaqarfiup pikkorissaanermut ataatsimiititaliaanit pingaarnersiorlugit Aninaasanut Inatsimmi aalajangersakkat apeqqutaatillugit tulleriiaarneqartarput. Ilinniakkanut ataasiakkaanut ilinniakkallu assigiinngitsut akimorlugit pikkorissaanerit inerisaanermullu tunngatillugu sammisat immikkut pisariaqartitanut piukkunnarsakkat neqeroorutaapput. 

 

Illutaa

Peqqissaanermik Ilinniarfik Nuummi Jagtvej nr- 2-mi inissisimavoq. Illup pisoqaanersaa 1953-imeersuuvoq 1200 kvadratmeterisullu annertutigaluni. Aallaqqaammut taanna 1993-imi peqqissaasutut ilinniartitanerup eqqunneqarneranut atatillugu unitsinneqartut sundhedsmedhjælperinngorniat ilinniarfigaat. 2004-mi ilassutaa piareerpoq ilinniarfiullu suliassaqarfii tamakkerlutik ataatsimuulerput. Siornatigut tunngaviusumik ilinniartitaanerit umiartornermut ilinniarfiusimasumi inini qullerni inissisimapput. Hammer, Schmidt & Lassen ilassutaanik 1200 kvadratmeterisut annertutigisumik titartaasuupput. Peqqissanermik Ilinniarfik maanna 2.400 kvadratmeterinik angissuseqarpoq. Illu aserfallatsaalilluagaavoq.