Tarnikkut katsorsaasunngorniat ilinniarnertik qiteqquppaat
 
2016-imi novembari qaammat tarnikkut katsorsaasunngorniat 28-it akuerisamik / inuup nammineq avatangiisaasalu oqaluttuassartaanik tunngaveqarnissamik isumaliutersuut
naapertorlugu ilaqutariinnik- tarnikkullu katsorsaasutut ilinniarnertik aallartippaat. Ilinniarneq katillugit modulinik 16-inik immikkoortortaqarpoq ukiunillu sisamanik sivisussuseqarluni. 
Ilinniartut maanna ilinniarnertik qiteqquppaat ilinniartullu tamarmik 2016-imi novembari qaammat aallartittut suli ilinniarnerminnik ingerlatsipput. Inuup nammineq avatangiisaasalu oqaluttuassartaanik tunngaveqarnissamik isumaliutersuummik aallaaveqarluni ilaqutariinnik katsorsaanermik ilungersorlutik ingerlatsipput, maannalu ilinniarnerminni ukiut pingajussaannut- misigisanik anigoruminaatsitanik taakkulu inuunermut sunniutigisinnaasaannik katsorsaariaatsimut piareerlutik.

Ilinniartitaaneq, Naalakkersuisut meeqqat ilaqutariillu atugaannik pitsanngorsaanissap qulakkeernissaanik suliniutaannut ilaavoq. Ilinniartut kommunini Namminersorlutilluunniit Oqartussani inunnut sulinerminni naapitaminnut iluaqutaasussamik ilisimasaminnik piginnaasaminnillu atuilereerput.
Tarnikkut katsorsaasunik atorfissaqartitsinerup annertunerujussua ilinniartitaanerullu iluatsilluarnera pissutaallutik Isumaginninnermut Inatsisinillu Atuutitsinermut Naalakkersuisoqarfiup ilinniaqatigiinnik allanik 2018-ip naalernerani aallartitsinissaq toqqarpaa. 
 
Ilinniartitaaneq, Danmarkimi SIF ( Systemisk Institut for Familieterapi)  www.sif-udd.dk ilinniartitsisunittaaq modulinut tamanut Nuuliartitsisoq qanimut suleqatigalugu, Peqqissaanermik Ilinniarfimmi ingerlanneqarpoq.