Peqqissaanermik Ilinniarfimmi Systemisk Institut for Familieterapi (SIF) suleqatigalugu tarnikkut katsorsaasutut ilinniartitaanermik neqerooruteqarsinnaanngorneq nuannaarutigalugu nalunaarutigisinnaavarput.

Tarnikkut katsorsaasutut ilinniartitaanikkut ataasiakkaanik, aappariinnik ataatsimoortunik ilaqutariinnillu katsorsaaneq piginnaaneqarfigilissavat. Ilinniartitaaneq kalaallit kulturiannut naleqqussagaavoq SIF-illu ilinniarnerup ingerlanerani ilisimasat saqqummiunneqartut nunatsinni atorsinnaanissaat eqqummaariffiginiarpaa.

Tarnikkut katsorsaasutut ilinniartitaanermi saaffigineqartut tassaapput:

Isumaginninnermut- ilinniartitsinermut- peqinnissamullu tunngatillugu qaffasissumik akunnattumik sivisussusilimmik ilinniagallit pisortallu suliffeqarfiutaanni atorfeqartut.

Qinnuteqartup ilinniarnerup immikkoortuini tamani peqataasinnaanissaa sulisitsisup qulakkiissavaa.

Paasissutissat nalinginnaasut:

Tarnikkut katsorsaasutut ilinniarneq ukiumut sisamanik immikkoortortaqarpoq. Immikkoortut tamarmik ullunik tallimanik sivisussuseqarput. Ullaakkut qulaaluaniit unnukkut arfinernut ilinniartitsisoqartassaaq immikkoortunilu unnuit marluk misilittakkat pillugit oqallittoqartassalluni /isummersoqatigiittoqartassalluni sungiusartoqartassallunilu. Ilinniarnerup immikkoortui sapaammi aallartittassapput sisamanngornermilu naammassisassallutik. Ilinniarneq Nuummi Peqqissaanermik Ilinniarfimmi ingerlanneqassaaq. Ilinniarnerup ukiumut immikkoortuisa sisamaasut saniatigut ilinniartut eqimattanngorlutik imminnut katsorsassapput. Taanna ukiut aappassaanni, pingajussaanni sisamassaannilu katsorsaasunit kalaallinit isumagineqassaaq. Ilinnialernissamut nalunaarnerup ilinniarneq tamakkerlugu peqataanissamut pisussaaffiliinera maluginiaqquneqarpoq.

Ilinniarneq 2016-imi novembarip ulluisa 20-anni aallartissaaq 2020-imilu naammassissalluni.

Moduli 1 – Paasissutissiineq: 20 – 24. november 2016

Moduli 2 – Sullitap imminut pilluni oqaluttuaa qitiutillugu katsorsaaneq: 5- 9. februar 2017

Moduli 3 – Ineriartornermi tarnip pissusaata allanngoriartortarneranik ilinniarneq: 7 – 11. maj 2017

Moduli 4 – Sullitap imminut pilluni oqaluttuaa qitiutillugu katsorsaaneq soraarummeernerlu: 20 – 24. august 2017

Moduli 5 – Kinguaassiuutitigut innarliinerit: 22– 26. oktober 2017

Moduli 6 – Paasinnittariaaseq tunngavigalugu oqaloqatigeeriaaseq: 25. februar – 1. marts 2018

Moduli 7 – Paasinnittariaaseq tunngavigalugu oqaloqatigeeriaaseq: 13 – 17. maj 2018

Moduli 8 – Sullitap imminut pilluni oqaluttuaa qitiutillugu katsorsaaneq soraarummeernerlu: 12 – 17. august 2018 



Ukiut kingulliit marluk suli ullulerneqanngillat.

Immikkoortuni peqataaneq akeqanngilaq. Ullut pikkorissarfiit nerisaqartitsisoqassaaq.

Angalanermut ineqarnermullu aningaasartuutit Peqqissaanermik Ilinniarfimmit akilerneqassapput. Atuakkanut aningaasartuuteqarnissaq naatsorsuutigineqassaaq.

Immikkoortunut ataasiakkaanut najoqqutassat nittartakkami: www. pi.gl –imi saqqummiunneqarumaarput.

Qinnuteqarfissaq kingulleq: 14. oktober 2016

Qinnuteqaat (immersugassaq ilanngussaq takuuk) uunga nassiunneqassaaq:

Peqqissaanermik Ilinniarfik

Svend Jungep Aqq. 2

Postboks 1499,

3900 Nuuk

e-mail: cfspost@nanoq.gl

 

Paasissutissat sukumiinerusut:

Paasissutissat sukumiinerusut pikkorissaanermut immikkoortortami aqutsisoq Else Thygesen, e-mail: ethy@nanoq.gl oqarasuaat: 349382 pissarsiarineqarsinnaapput.

SIF pillugu uani paasisassarsiorsinnaavutit: http://www.sif-udd.dk/