Qarasaasiarsorneq Peqqissaanermik Ilinniarfimmi ulluinnarni akuuvoq. Ulluinnarni atuartitsinermi, paasissutissanik ujaasinermi, annikitsunik annertuunillu suliaqarnermi qarasaasiaq internetsilu atorneqarput.
Taamaammat ilinniarfik ilinniartunut, ilinniartitsisunut pikkorissartunullu isumaqatigiissuteqaaqaarnikkut qarasaasiarsornermut atortunik atukkiussisarpoq.

Qarasaasiat:

• Inini ilinniartitsivinni tamani ilinniartitsinermi atortussanik seqersitanik sarsuatitsivilinnik qarasaasiaqarpoq. Tamatuma saniatigut init ilinniartitsiviit ilaanni allattarfeqarpoq qarasaasiamut attavilimmik.
• Ilinniartunut qaffasissumillu ilinniagalinnut inimik katillugit arfineq pingasunik qarasaasialimmik qarasaasiarsortarfeqarpoq.
• Torsuusani eqimattanngorluni suleqatigiinnut inissiani ilinniartunut pingasunik qarasaasiaqarpoq.
• Atuakkanik atorniartarfimmi qarasaasianik angallattakkanik atorniartoqarsinnaavoq. Tamanna pillugu uani paasisassarsiorit.

Internetsi:

Peqqissaanermik Ilinniarfik tamakkerluni angallattakkanik qarasaasiarsornermut ataatsimut attaveqarfeqarpoq. Tamatuma saniatigut qarasaasiat angallattagaanngitsut internetsimut attaveqarput. Peqqissaanermik Ilinniarfiup internetsimut attavia ilinniakkanut tunngasuinnarnut atugassiaavoq.

1. Atuakkanik atorniartarfimmi qarasaasiaq ataaseq internetsimut attaveqarpoq. Taanna paasissutissanik ilinniartitsinermut naapertuuttunik ujaasinermut atugassiaavoq.
2. Peqqissaasunngorniat sundhedsassistentinngorniallu ilinniarnerup aallartinnerani namminneq qarasaasiamut isissutissaminnik, e-mail-ilerfissamik namminerlu toqqorsivissaannik tunineqartarput.

Peqqissaanermik Ilinniarfimmi ilinnialerlaat qaffasissumillu ilinnialerlaat tamarmik ilinniarnerup aallartinnerani ilinniarfiup qarasaasiarsornermut atortorissaarutai pilluguit paasissutissinneqartarput.